Home / Lamarocaine TV / الإسم الغفيل سكينة اللقب شاعرة البادية

الإسم الغفيل سكينة اللقب شاعرة البادية


ثروة بلادي
الله الله على موروث بلادي
فرحو بيه جوادي
بلادي كلها خيرات
و ورتتنا التراث
وللموسم كي جيت
سمعت صلا وسلام وزغاريت
ياريت ويا ريت
وشحال تمنيت
نركب على الخيل وتصبح صبحت العلام
ولكن الخيل خاصها لقوام
قبل ما تشرب شربيه
وقبل ما تاكل وكليه
ومتنساش تعوميه ولا صتي الجهد الذهب علݣ ليه
الخيل تنسى راسها
ودعي لناسها
العود يدعي لمولاه لي تحث جناحو رعاه
وݣالك الرزة والشد من جد لجد
والحبة والبارود من ظهر العود
ايلا عودك رضى عليك
وبارودك بين يديك
الجمهور يوقف ليك
وأنا نݣولك يا المقدم تبارك الله عليك
هزيت المشعل بين يديك
دير الخنجر فالخصر
وخلي الخيل فالأرض تحفر
الخيل حفرات
والفراجة عاد بدات والناس بالموسم مسخات
كلا سربة ولباسها
وكلا سربة وناسها
وأنا السرية لي تجين على الݣانة
هي لي طلق طلقة مزيانة
على صوت البارود ملهوف
نتسنى ايمتا للخيل نشوف
الخيل بانواعها ولوانها جنناتني
وبلا عقل خلاتني
ها خط الريال
ها حجر الواد
هالدهم وما يركب على ادهم غير لي كيفهم
الخيل كلها زواق
وما يركب عليها غير الدواق
وأنا عليها نحماق
الله الله ولعب يا الخيل وفرحين
وهاكداك على الݣانة تجينالخيل تركبها النسا والرجال
والجمهور على طلقة مݣادة عوال
ياالله يالمقدم تقدم لݣدام
وحكم اللجام
ووجه العلامة راك وسط الامة
يالله دير دير البارود بين يديك
واحنا معولين عليك
طلق طلقة تسر الخاطر
وتفرح الناظر
الناظر ملهوف
على السربة يشوف
السربات لوانهم لوان النوار
وشتاقو ليهم الزوار
على الموسم ران مجنون
ونتسنى السربة لي تبرك على البوطون
هاد لقصيدة ليك وعليك
يالخيل يالي جننتين وزرعت فقلبي الفرحة
ونزعت الغبينة
يا الخيل الزينة
هادي ثروة بلادي
وموروث جدادي
وقدرة الفرسان سيدي محمد السطان

Check Also

🔴 سكان بعض أحياء جماعة أولاد عبدون يراسلون وزير الداخلية

./عبد العزيز بخاخ في شكاية موقعة تتوفر المغربية للأخبار على نسخة منها، راسلت ساكنة أحياء …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *